ӨНЭЗС нь хүн амын амьжиргааны түвшин, ядуурлын байдлыг тодорхойлохоос гадна өрхийн орлого, зарлагыг тооцох, хэрэглээний үнийн индекст ашигладаг сагс болон жинг шинэчлэх, ДНБ-ийг хэрэглээний аргаар тооцоход шаардлагатай мэдээлэл гаргах зорилготой улсын хэмжээнд төлөөлөх чадвартай судалгаа юм. ӨНЭЗС-г ҮСХ-ноос тогтмол явуулж байгаа бөгөөд нэг жилийн хугацааг хамруулан дүн шинжилгээ хийж байна. Энэхүү тайланд 2011 оны 12 сарыг хамруулав. Амьжиргааны түвшнийг тодорхойлох судалгааны хэвшмэл хэд хэдэн модулийг урьд нь явагддаг байсан ӨОЗС-нд хамтатгасан тул ӨНЭЗС-г Амьжиргааны түвшний түүвэр судалгааны сайжруулсан хувилбар гэж нэрлэж болохоор билээ. Гэхдээ 2007-2008 оныхоос ялгаатай нь хураангуй хэлбэрээр явуулсан тул зарим модулийг хассан бөгөөд дараах 11 гол модулиас бүрдэж байна. Үүнд: өрхийн гишүүдийн тухай нийгэм, эдийн засгийн үндсэн мэдээлэл, боловсрол, эрүүл мэнд, ажил эрхлэлт, газар тариалан ба мал аж ахуй, өрхийн аж ахуйн болон бусад орлого, сууц ба эрчим хүч, удаан эдэлгээт бараа, хүнсний бус зарлага, хүнсний хэрэглээ зэрэг болно.
